المشاركات

عرض المشاركات من مارس, ٢٠١٩

لحظة وداع #شعر

. . رفعت كفي ما قدرت ارفع الصوت لو كان فالخاطر كلامٍ كتمته لحظة وداع وكنها سكرة الموت ضاع الطريق اللي من اول رسمته ضاع الطريق وصرت في الدرب مبهوت مدري وش اللي فاتني ما اغتنمته! العمر مرّ وراح مع فايت الفوت صحيح ضعت وضاع حلمٍ حلمته الا انت ياللي قربك لروحي القوت لو غبت يبقى وسمك اللي وسمته يبقى كما نقش على الصخر منحوت حفظته بشكله ولونه وسمته ولو الفراق اوجاع والبعد ممقوت اصبح مصيرٍ من غلاك احترمته دمع النصر لو طاح من (عين جالوت) (عين العقل) دمع تكنّه/ حشمته ذخرت لك يا فرحة العمر تابوت فيه الغرام اللي بديته ختمته يبقى الغصن لو ما بقى فالغصن توت يحرك انسام الذعاذيع.. صمته سكّت وانا من موادعك مكبوت شي تجاهلته.. وشي فهمته حبل الرجاء من جور الايام مفلوت ياليت قلبي عن غرامك عصمته ياما بنيت بيوت وبيوت وبيوت اليوم كم بيتٍ بنيته.. هدمته . . #شعر// #مشعان_البراق . .

حياض الهوى. #شعر

. . يا تل قلبي من فعول الهوى تل تلة مود بالجفا دار حوله العين ممروضة وجفن السهر مل غديت مثل النجم في وقت أفوله إن قلت قول قالوا الناس ما دل والا سكت يقولوا أزريت أقوله يا وقت مالي فيك حيلة ولا حل عليل فرقا والسنين معلوله والقلب ياما فيه للود من غل من كثر ما أعياني على حد قوله ليل الغرام اللي ذبحني من القل ما نيب له قاسي وعيني خجوله اليوم ثالث عام للحب كمل يا كيف ينسى صاحبي بالسهوله أحسب عليه منول اليوم لا زل واليوم حتى الصوت عجزان أطوله يا ليت قلبه من حياض الهوى عل كما تعل عيوني أطياف زوله والله لو ما حل بي فيه قد حل ما أشكي الفراق ولا أنحرم من قبوله والحب يا ما به فقيرين ومقل كم ناس حتى بالمشاعر كسوله واللي يدور في سراب الظما ظل يموت من حرّ الفراق ورسوله حروفي الريحان وخدوده الفل لا تنشد العاشق يدلك نحوله وإن قيل خير الهرج ما يختصر قل العشق بعضه من كمال الرجوله يا هني من ما له خليل ولا خل ما عنده من الحب شي يقوله . . #شعر// مساعد بن جميل .

عذب الأنغام #شعر

عذب الأنغام   تسوقنا الأقدار ونسوق الأقدام يوما لنا يحسب ويوما علينا للخلف ما ننظر والأرزاق قدام وللمرجلة مسرى الذيابه سرينا على يقين بقسمة الله والأحكام مقسومنا الطيب تحوشه إيدينا أحرار ما عشنا على الأرض خدام نسوقها غرب وشمال ويمينا أما ننال من الفخر تاج ووسام ولا على نفسنا زعلنا ورضينا ما نعيش بالدنيا وساويس واوهام ولا نعيب الايام والعيب فينا ضعف الإرادة من مفاتيح الاسقام يفتح علينا باب للطامعينا لا والذي شرف رسوله بالإسلام ما تنحني هاماتنا لو فنينا نبني قصر للمجد ما نبني خيام وندرى القدم عن زلته لا مشينا نخاف بالزلات نشفع للأخصام ورداهم اللي في خطانا يهجينا قولولهم عن كثرة الحكي صيام لا صار ما به لازمه ما حكينا أحوالنا دايم على خير ما يرام لا يفرحون أصحابنا الشامتينا واليا رموها صوبنا أقراب وأعمام ما كن حنا عن خطاهم درينا العفو عند المقدرة طبع الأكرام فيه الصلاح ومنهج الصالحينا مقبل البلوي