دروس الحياة #شعر
.
.
دروسك يالحياة بداخلي في كل حين وحين
غديت بمدرستك الطالب اللي الدرس ما فاته
اجيها مثل طفل ماسك كراسة التلوين
يحاول يعكس الوان البراءة في رسوماته
لقيت دروسها في هالبشر تعرض منين لوين
وداخل كل درس جيت اسولف عن علاماته
ترى ما كل من يملك عيون وساع شوفه زين
ولا اللي عنده عيون صغيره قد نظراته
ولا اللي خطوته عند الملاقا ما تجي مرتين
مثل من يحضنك عند الوصال بكل رغباته
ولا من رافقه حزنه كئيب ودمعته بالعين
مثل من يمسح دموع الفرح من فوق وجناته
ولا من قابله خله بصدّ وفارقه لسنين
مثل من هو على الموعد يسامر عذب خطواته
ولا من عاش هالدنيا ضميره غارق بالدين
مثل من يجلس ايعد الفوس بكل غلطاته
ولا يذبحك غير الصاحب اللي يلعب بحبلين
يهيم بقلبك الطيب ويسرق منك دقاته.!
وله وجه تحلف انه من اشباهه غراب البين
ويفرق عنه في ريش البياض الخادع لذاته
اذا اقبل له اشراقة بياض يعزف التلحين
واذا خذ حاجته اقفى سواده في مسافاته
والادهى والأمرّ انك ترافق قلب ما به لين
حقود يكتم بصدره حسد يحرقه نبضاته
وصبرك لو تحملته قسمته داخلك صبرين
ولكن لو تحملك الصبر يا كود قسماته
وقف درسي عن انفاسه وجفت علبة التلوين
ولا حسيت الا والجرس يصرخ برناته
سخيه ذا الحياة دروسها في كل حين وحين
وبخيله لا بغى قلبك يعوض كل ما فاته.!!
.
.
#شعر
عبدالله سليمان العمار
.
.
تعليقات