من شموخ الجبال #شعر

.
.
في ليلةٍ مات فيها الحلم وأبكى الحليم
ترثيه سودك الى هبت عليه الشمال

دايم عذابك جديد وتذكرين القديم
ياملهمه.. وين أنا والصبر والاحتمال

خليت عقلي على شانك خصيمٍ غريم
ومديت يمناي أصافح كل شيء مال

بين الرضا والغضب.. تكبر خطايا الحكيم
والشرهه ادفن عتبها في عروق الرمال

درب تبينه مشيته لو طريقه دحيم
الحب عين العقل.. لو كان راس الهبال

انتي وأنا والغلا.. فرحه نجاح اليتيم
ما عنده أحدٍ يصفق له على ما ينال

بشراه في خاطري خلت ضلوعه حطيم
محتاج كلمة هلا.. محتاج كلمة تعال

وأنا سقتني همومك من غضبها حميم
ورا بلا ذنب حبيتي عذابك زلال

علام أنا منك.. ماني من عذابك سليم
آهات الأيام.. ما ترحم سكون الليال

يا غالية للوفا بابٍ بقلبي كريم
مافيه يومٍ تعذر لك كريم السبال

حتى على كسرتك للخاطر المستضيم
من غير منة عطيتك من شموخ الجبال

يكفيني اني جعلتك بدر.. عقب العتيم
ويكفيني اني جعلتك شمس عقب الظلال

ويكفيني اني جعلتك سر باقصى الصميم
من دون حدب الضلوع يموت عنك السوال

خلدت حبك بشعري واحتواه النسيم
غنوا به أهل الهوى موال والليل شال

ياليت الأيام تنسينا العذاب القديم
ويطيب فال الهوى.. والفال يقفاه فال
.
.
#شعر// حمد الأسعدي
.
.