طقوس الشوق #شعر

طقوس الشوق

ظلام الليل وجداني بدونه والعيون تخيل

اسج بنظرتي واسهى عن الدنيا وما فيها

تصير من الوله ريشه وجفني يحمل التشكيل

وفي وسط الفضا ترسم لها صوره تناجيها

وصارت عادةً فيني اذا ظلٌم علي الليل

سكونه كنها روحي تسمع في حكاويها

تذكرنى بها عبره اذا شفت البدر وسهيل

طلوع البدر طلتها ونجم سهيل طاريها

خيوطً بيض اوصلها على حد النجم توصيل

واميلها اذا مالت وعدلها واساويها

طقوس الشوق في عين المنجم متقن التحليل

تخيلها حياه ولاقدر ليله يخليها

ولجل عيون من حب. وعشق من شانها التضليل

عن العالم عزل روحه وعايش في خلاويها

اموت من الوله في داخلي عبره تهد الحيل

عبر نظرة عيوني في ظلام الليل اسريها

تنام عيون خلق الله وعيني كنها الدربيل

تبعد صورتك عني وشوق الشوف يدنيها

واذا غابت سرجت السٌبع وطوعتها لي خيل

ومن بين النجوم ابيات شعري فيه اغنيها

قصيدً يبهر المحار وكل اللي يقول القيل

نظم من شوق بيطارً تمكن من قوافيها

ولاهو حلمً مرهونً علي مايشتهي التاويل

حقيقه داخلي وجله وبظلوعي اغطيها

غدى جسمي كما لو فيه ناس وفيه قال وقيل

ليا منى تذكرت الوصوف اللي تحليها

وانا لامن طرا لي رمشها الفتان ذقت الويل

اجل واشلون عضات الشفاه اللي تسويها

سحاية عينها تملا السما وابروقها التسبيل

يسيٌل غيثها وادي وانا اغرق وسط واديها

واذا كان البلا نظره ترى منها الدموع تسيل

على خد الكفيف اللي بشوف الناس ينعيها

ولو ما فلامل باقي خيوط تكمل التفصيل

ذبحت الروح فغيابه ولا ابغى من يعزيها

ولا ياحظى العاثر طلبتك وانت نهر النيل

اذا منتا مجملنى. عليا لا تقسيها

إبراهيم بن نماي الرحيلي