ذاكرني حبيبي وناسيني #شعر


.



سقا الله طيفٍ كل ما ابغى لذيذ النوم

تهادى علّى وطيّر النوم من عيني

عليك العتب والحق واللوم يتبع لوم

يا راع الثمان اللي غيابه مقاصيني

هذا الحول حلّ وكل يومٍ قفيّه يوم

وانا بين ذاكرني حبيبي وناسيني

ياشين الطواري والهواجيس للمحروم

تقول انها تاكل وتشرب من اسنيني

ياراع الغياب اللي عليّه تزومه زوم

عسى ما انت ناوى عقب ضحكك تبكيني

ماغير أتهجى (ما لنا الله عن المقسوم)

وانا والله ان الهم والوجد طاويني

علامك بعد قرّبت يمك بعيد الحوم

وانا في غرامك كن قلبي موصيني

طعنت الفواد بسيف فرقا ماهو مثلوم

وضيقت صدري لين ضاقت شراييني

كبيرة بحقي يوم سمت المفارق سوم

وانا كنت اراعي لك واحسبك تراعيني

زمانٍ مضى واشواقنا كنهن التوم

ليا عاث بي شوق التولع تواسيني

وهالحين كنك منت في واقعي ملزوم

تغيّرت عني عقب ما انته مصافيني

تبي الصدق ضعت وضيعتي ضيعة المنجوم

لعل الليالي فالمقابيل ترضيني

بعد مات حبك وانتهي قلت له مرحوم

غرامك توفى والبقا لا تعزيني


-

#شعر / #سعد_براك

.

تعليقات

المشاركات الشائعة من هذه المدونة

بنت الاجواد #شعر

العود الأزرق والعبير لـ بن جدلان

قوى العزوم #شعر