تجيني همومي كل ليله بلا ترتيب #شعر
.
تجيني همومي كل ليله بلا ترتيب
.........................
سعيّد العمودي
-
على الرغم من ضيق الامل وانحصار الطيب
تلالا بعيني ضو خافت وقداني
مشيته بقلبٍ صادقٍ ماغشاه الريب
افرّق دروبي لوظلامي تغشاني
الايا قدم رجلي عن المهزله والعيب
ابشوف في عين الامل كل الالواني
خبرت الليالي ياحمد صدقها تكذيب
تغرن وانا في دربي الصعب وحداني
اقلب حياةٍ ماضيه واحضره واغيب
اسولف علي نفسي وافضفض من احزاني
تجيني همومي كل ليله بلا ترتيب
علي غير موعد كل ليله تقهواني
خذتني بقّوه ماخذت خافقي تهذيب
تسود وتسيد وطيفه الشين صحّاني
عبرت الحدود وجيتها بدافع الترغيب
ابرحل من ايام الشقا دون عنواني
ابمضي برحله غامضه مخطيٍ ومصيب
اغرّب وانا قلبي علي الشرق يحداني
على ضو قمرا سهرت الساهرين تطيب
يروح الظلام وضايق الصدر سهراني
اخاوي هواجيسي على نغمة التعذيب
واغني همومي للورق واعزف الحاني
انا في شبابي توني مابلغت الشيب
اسوق المطايا للامل واهجر اوطاني
اشوف الوجيه الحاقده مابها ترحيب
تبسّم نفاق وقلبه اسود وملياني
تقدر حضوري مجبره والحضورمهيب
تموت الارانب في رجا موت سرحاني
ابي من يبيني وافياوان دعيت صحيب
يسرن اليا من الزمن شان واشقاني
تهمه علومي لاغدى سايل ومجيب
الا قيه بالضيقات وان ضاق يلقاني
تراها مخوه ماتبي يالخوي تحسيب
على السلم الّاول والعمر يالخوي فاني
تآدبت من دنيا العنا ياحمد تآديب
اعاقب علي الزلات واعفو عن الجاني
لان الحياة الفانيه كلها تجريب
تشدك وتركض في سباقٍ وميداني
سفر والسفر يامسندي ضيقه وتغريب
تضيق المساحه كلها بعين الانساني
.
تعليقات