المكارم والشيم #شعر

من لا يشمِّر للمواقف كمومه

مازاح له همٍ ولا نال ناموس

ما تستره بين الخلايق همومه

مادام ما يلبس من العز ملبوس

واللِّي على الشدَّه ضعيفه عزومه

تدوسه الدنيا تحت رجلها دوس

وسيفٍ يخبَّا بالقسا وش لزومه

لاصار ماهو باللقا ينسف الروس

ومن لا تعدّي دون حدّه سهومه

عقب التروّس يصبح الصبح مريوس

الخلق ماهي في بعضها رحومه

من طاح تبطش به مخاليب وضروس

من دون حقك لو تطول الخصومه

خلك جبل صامد وجوس الخطر جوس

ولا تلتفت للشر لاصار حومه

عنّك بعيدٍ بين ناحس ومنحوس

وابعد عن انذال الزمان ورخومه

لاصار واقعها من الحقد متروس

لو بعضهم يحضى صلاته وصومه

يفرح ليا شافك من الوقت محبوس

لو كان قدَّامك يزيِّن علومه

شفقٍ يدوِّر طيحتك لَوْ بفلوس

من جنّب الأنجاس ما احدٍ يلومه

ما يستعز مرافق ارذال وهدوس

يعيش رجلٍ كل عالي يرومه

راسه رفيع ومحزمه دوم ممسوس

يتبع نهج دينه ويحفظ سلومه

وحب المكارم والشيم فيه مغروس

-

#شعر #خليل_بن_هدلان

@KhaleelBinHdlan
.