على طاري هل الطيبة

    على طاري هل الطيبه ذكرتك يا عديل الروح
وقربت القلم والطرس ابكتب فيك ما لاقِي
سلام الله على قلبك عدد ورقي تجر النوح
سلام من صميم القلب اجدد فيه ميثاقي
حبيبي كيفها حوالك عساك بخير يا المملوح
عساك بدنيتك تفرح ودربك كله إشراقي
حبيبي يا هنا روحي بسولف لك غلا وأبوح
ابين لك عن احوالي عقب ما لحت بفراقي
لعلمك عيشتي صعبه بلاويها شقا وجروح
على لب الغرام اللي حضنته داخل اعماقي
بدونك يا صعب حال غلاه بداخله مطروح
يصارع لوعة ازمانه يساير عمره الباقي
حبيبي لا تخليني ترى ما في الهجر مصلوح
فديت عيونك النجلا أنا لك حيل مشتاقي
ابيك قريب من عيني تداوي قلبي المجروح
وابي همسك يداعب مسمعي يا دمث الاخلاقي
ابيك بسحرك الفاتن وابيك بصوتك المبحوح
ابيك بشوق ولهفه احسه لحظة عناقي
ابيك تثير ما فيني وبسمع ضحكة ومزوح
وابي احساسك المرهف يترجم ذوقك الراقي
ابيك تغيظ غذالي ونبني حبنا بصروح
ونفتح صفحة بيضا وننسى ماضي اوراقي
على باب الرجا واقف وابي باب الوصل مفتوح
بيدينك تسعد أيامي.. مدامك نبض خفاقي
حبيبي جاتك اخباري وابي منك خبر بوضوح
أبي رد ينومسني يعيشه صادق اشواقي
وعلى طاري هل الطيبه ذكرتك والبروق تلوح
ترى هجر الحبايب يا حبيبي يرهق ارهاقي


...
 
حسن بن علي الهاجري
الكويت


.