الأرض يكفي عن بحرها برها

    
.
ياقلب والله ماعلى الدنيا حسوف
عن خيرها لازم تكافا شرّها
لا تامن الدنيا تراها ام الصدوف
جرّب حلاوتها وجرّب مرّها
مهوب دايم مشيها حسب الشفوف
اصبر على برد السنين وحرّها
وان جاتك الطعنات من بين الكتوف
الارض يكفي عن بحرها برّها
اصحابك اللي في اللقاء مثل السيوف
لا تامن الدنيا عليك تفرّها
في الوقت ياكثر المشاكل والظروف
من كثرها كل الوجيه تمرّها
والله لو مالي على الناس امعروف
ان كان ما سريتها ما ضرّها
تجيني الزله واخليها تطوف
تمر والبسام في مقرّها
اي والله اتركها سحا مهوب خوف
وتلقى لها وجهٍ ودر يجترّها
لن الضعيفه وزعة الناس الضعوف
اللي تسوي الخامله وتصرّها 

-

عبدالله مقبل العصيمي

-